1Cor 14 | WSK | STEP | Buta se ninimi ko kuera ko munan mu gira beteralko. Ale Korang Bur ko munan talko ninguru sail tagiralko. Bare Kaem kuring tal ale balalko munan mu talko ninguru nunguningkiri sail tagiralko.

1 Corinthians 14

Ana Korang Bur ko munan nangarso mu te Kris alo sangam nungarnakko

1 Buta se ninimi ko kuera ko munan mu gira beteralko. Ale Korang Bur ko munan talko ninguru sail tagiralko. Bare Kaem kuring tal ale balalko munan mu talko ninguru nunguningkiri sail tagiralko. 2 Mu awuk, awiriya den nu me ko ikia wore te munakoso, mu nu kariimet me nunga manarso, nu Kaem manarso. Se kariimet mu den nu balso mu ko nunguning me ikisan. Mu nu den nunguning yumura te wore Korang Bur ko sokel te nu balso. 3 Bare kari Kaem kuring taso ale kariimet nunga manarso, umutang nu nunga sangarso, ale nongomang motam sokel tuso, ale nongomang ira den nungarso. 4 Kari den bo nu me ikia wore te munakoso, mu nu kota numi sokel tuso. Bare kari Kaem kuring balso, mu nu Kris kariimet suen la sokel nungarso.

5 Aninga angamang nina suen la den saki nina me ko ikia mu te munakaralko. Bare aninga angamang biyala mu nina Kaem kuring tal ale balalko. Kari Kaem kuring taso ale balso mu nu kari den me ko ikia wore te munakoso mu kiaram. Bare kari den me ko ikia wore te munakuruk ale aking Kris alo nongomang sokel tuokko mu gurugok ale den nuna suen la ko ikia mu te baluk mu asele nuna am koma suwanta.

6 Aga singsang, ani nengete tairik ale den sang nina ta ani ta me ko ikia mu te munakirik, mu nenenga sanguk i? Mena. Bare ani ikia iru saki Kaem aga kausam mu balik, ikia ningo saki ningarik, Kaem kuring taik ale balik, ale Kaem den saki ninga kausek mu asele ninga sangukko. 7 Se kolara amilmil ko mel, sige duap agi, guitar agi, umutang te kolomon, bare ko nirung ninguru me aratuk, mu saki alo dogotak awuk ta ko ikimonko? Mena. 8 Aking kager ko goyak ninguru me elemon, mu awiri ta kager ko numi nungokko? Mena tala. 9 Se umu turantala, den nina, se nuna me ko ikia mu te nina munakaral, mu ko nunguning nuna awuk ikimonko? Mena. Mu nina am nengeta sor ipi munaka lagaral, nunguning mena.

10 Ali sor imi te den duap duap aniso. Bare bo ta ko nunguning mena iwita mena, ko nunguning ago la. 11 Bare ani kari den baluwoso mu ko nunguning me ikiek, se nu ani den baluwasam mu ko nunguning me ikiok, mu ana kari ilagala mu nanga wonong sor kirker wore iwita. 12 Ani ikisam, nina Korang Bur ko munan talko sail tagisan. Buta se munan Kris alo sokel nungarso mu ko ninguru sail tagiral ale talko.

13 Se umutang ko, kari den nu me ikia mu te munakoso, mu nu Kaem aru manuk, se den balso umutang gurugokko ko sokel tuokko. 14 Mu awuk, ani den bo me ikia mu te ngatangasam, mu ani angamang ningi ago la ngatangoso, bare aga ikia te mu den baluwasam mu ko nunguning ani me ikisam. 15 Se ani awuk maik? Ani tom saki angamang motam ningi ngatangirik, ale aking tom saki aga ikia te ngatangirikko. Ani tom saki angamang motam ningi wur iluwek, ale aking tom saki aga ikia te wur iluwekko. ^{▼▼1 Cor 14:15 Tom saki ana den ana me ko ikia mu te ngatangasan ale wur ilusan. Tom saki ana nanga ikia te ngatangasan ale wur ilusan. Korang Bur nanga sangarso: John 7:37-39; Rom 8:26; Eph 5:27.}

16 Bare ni gemang motam ningi Kaem amilmil tuiwer se kari bo bagoso mu den sumu nu me ko ikia se, mu nu awuk ta nika amilmil den sumu ko kopa te “nunguningta pa” ma balukko? Mena. Mu nu ni den baluwasam mu ko nunguning me ta ko ikiso. 17 Ni yawarakala Kaem amilmil tuiwasam agila, bare kari sumu ni me sangorsam.

18 Nina den me ikia mu te munakasan tala, bare ani mu ninguru te munakasam mu ko ani Kaem amilmil tusam. 19 Bare ani Kris alo nunga biguwura ningi mu den ani se nuna me ikia mu te ani den suen biya me balikko. Ani den tukunangta nuna ko nunguning ko ikimon se nunga sangukko mu la balikko.

20 Aga singsang, nina kuriang mimili ikia sinar mena iwita me bagaralko. Mu nuna munan memek memek me ko ikisan mu nunga turan bagaralko, bare ninga ikia te mu kariimet garuk iwita ikia sinar ago bagaralko. 21 Kaem ko den te iwita aniso:

“Ani Kari Biya iwita balsam:
Ani sor saki ko kariimet nunga den kirker wore nunga nuguring te kariimet imi nunga manikko,
bare nuna aninga den me ikimonko.” ^{▼▼1 Cor 14:21 Girakala Juda alo nongomang aora biya, se Kaem nuna Assyria alo nuguting te ikup tamonko den imi te nunga maonam.}
22 Nu buta balam, se mu te ana iwita ikisan, den me ko ikia mu te munakara ko munan, mu nongomang ningi nunguning mena alo te Kaem ko sokel aringimonko. Mu ana Kris alo te aringinak ikinakko mena. Bare Kaem kuring ta ale bala ko munan, mu ana Kris alo nanga mel. Mu nongomang ningi nunguning mena alo mu nunga mel mena.

23 Buta se nina suen la ninga biguwura ningi baga, den saki me ko ikia mu te munakaral, se saki me ikia alo, agi sang nongomang ningi nunguning mena mu taimon ale ikimon, mu nuna balmon, “Nina ngualasan pa!” mamonko. ^{▼▼1 Cor 14:23-24 Kariimet saki gusira den balman: Acts 2:13. Korang Bur ko sokel te giris palagasan: John 16:8.} 24 Bare tom nina suen la Kaem kuring baluwaral, se kari bo gomang ningi nunguning mena agi, kari bo munan mu me ko ikia mu kasu nagurok, ale den suen la baluwasan mu ikiok, mu den umutang gomang motam atumok ale ko bagara tuterukko. 25 Se ko ikia gomang ningi la ago lagoso mu wetang te aratukko. Se nu ali te bugura kulukuok ale Kaem nup patawuruk ale baluk, “Nunguningta Kaem nina nengerak bagoso!” ma balukko.

Ana Kris alo biguwunak ale munan diram te la Kaem nup biya tunakko

26 Buta se aga singsang, iwitata beteralko: Tom nina tai bolala awural mu bo wur karogo, bo saki nunga kausokko den ago, bo Kaem ikia kausam mu ko den karogo, bo mu den nu me ko ikia wore te munakurukko, se bo mu den umutang ko nunguning gurugok ale ninga den te balukko. Nina mel suen biya beteralko, mu nina te ninimi sokel tualko. 27 Se kariimet sang den nuna me ikia mu te munakomonko, mu ilagala agi, ilagala suwan agi, umutang la munakomonko. Bare biguwumon ale me munakomonko, suwan suwan munakomonko. Se bo mu den balman mu gurugok ale ko nunguning balukko. 28 Bare den mu ko nunguning bala ko kari bo me baguruk agi mu, kari den nu me ikia mu te munakawoso mu biguwura ningi kutek mauk ale gomang ningi la kota Kaem ilak munakurukko.

29 Kaem kuring tata ale bala ko kari ilagala agi ilagala suwan agi munakomonko. Se saki alo nononga den mu tutemonko. ^{▼▼1 Cor 14:29 Den mel tutenakko: Acts 17:11; 1 Thes 5:19-21.} 30 Bare bo baluwuruk se saki dagiwasan mu nunga ningi Kaem bo ikia tuok, mu kari giram munakawoso mu kutek maukko. 31 Nina singir la suwan suwan am Kaem kuring balalko. Se imikiri suen la te ikimon ale nongomang motam sokel taukko. 32 Kariimet Kaem kuring tasan ale balsan, mu nuna munan umu nongote aniso mu nongota bitarmonko. 33 Mu awuk, Kaem mu mel ngual ngual bitirukko Kaem mena, Kaem mu munan diram la lila te beteso. Kaem ko kariimet wonong suen la te uwutata betesan.

34 Tom nina Kaem nup patowaralko biguwural, mu biguwura umu ningi imet me munakomonko, kutek mamonko. Law Den balam iwitata, imet mu kari nobowa ningi bagomonko. 35 Nuna den mel i ko isemonko agi mu, nunga kawam te nongota nunga nugari isarmonko. Imet biguwura mu ningi munakomonko mu diram mena. ^{▼▼1 Cor 14:34-35 Batoga saki girakala Greek den te batagorman mu te, verses 34-35 mu verse 40 buring ko aniso.}

36 Agi nina Corinth alo Kaem den ko duap e? Nina la Kaem ko den taman e? 37 Awiriya numi ikiso nu Kaem kuring ta ale bala ko kari, agi Korang Bur ko kari, mu nu iwita ikiokko, den ani nina bataguru ningarsam mu Kari Biya ko munan den ma balukko. 38 Bare nu uwuta ko me baluk, mu nina kari umutang ko den karogo nibiring tualko.

39 Buta se aga singsang, Kaem kuring tal ale balalko munan mu ninguru ko sail tagiralko. Ale den saki me ikia mu te munakara ko munan mu me menawuralko. Bare mel suen la ko munan te diram la beteralko.

40